dictionarios digital: ITALIANO 🇮🇹 • FRANÇAIS 🇫🇷 • ENGLISH 🇬🇧
Multe tempore ante le prime auti (anglese: selfie), le antique greces e romanes narrava le mytho de un persona con le obsession pro le imagine de se ipse. Brevemente dicte: Narcisso era un bellissime juvene qui errava per le mundo in cerca del amor. Post rejectar un nympha de nomine Echo, ille appercipeva casualmente su imagine reflexe in un speculo de aqua, e se inamorava de se ipse. Incapace de disligar se via de celle vision, Narcisso cadeva in le riviera e necava. Un flor stava in le loco de su morte, le mesme flor que on appella ancora hodie: le narcisso.
Le mytho captura ben le idea essential del narcissismo: un egoreferentia elevate e a veces nocive. Le narcissismo non es solo un typo de personalitate que appare in le columnas del revistas; il es vermente un insimul de tractos classificate e studiate per psychologos e sociologos.
Le definition psychologic de narcissismo es un imagine de se ipse grandiosemente amplificate. Secundo mi recerca sur le interrete, le psychologia recognosce due formas principal de narcissismo come tracto de personalitate: Grandiose e Vulnerabile.
Le narcissismo grandiose es le typo le plus familiar, characterisate per:
• Extroversion
• Dominantia
• Besonio de attention.
Le narcissistas grandiose normalmente perseque attentiones e poter, a veces anque come politicos, celebritates, o personages de relievo cultural. Dum alicun personas interprende un percurso active in le societate pro motivationes positive, ut attinger le plen potential personal, o dar auxilio al alteres pro render lor vita melior; le individuos narcissistas desira le poter pro un question de status e importantia personal, de quem illos pote servir se aliquando. Le narcissistas vulnerabile in vece pote apparer silentiose e reservate, illos habe un forte senso de egocentrismo, ma senti lor position facilemente menaciate e denigrate.
In omne caso, le latere obscur del narcissismo se monstra in le longe termine. On observa que con le passar del tempore le duces politic narcissiste poterea prender decisiones riscose o inethic, e le fidandiates narcissiste poterea esser dishoneste o infidel. Quando le vision rosee de illos ipse es mittite in discussion, illos pote devenir non solo rancorose, sed etiam aggressive. Iste typo de conducta es come un malaptia ubi le febricitante se senti plutosto ben, ma es le gente circum illo a suffrer.
Portate al extremo, iste conducta se classifica come un turbation psychic appellate turbation narcissiste de personalitate, toccante le 2% del population europee, exclusivemente adulte, e in majoritate masculin. Le ultime edition del Manual Diagno-Statistic del Association Psychiatric American describe aliquot tractos associate con le narcissismo pathologic, inter alia:
• un vision grandiose de se ipse
• problemas de empathia
• un senso de superioritate
• le necessitate de admiration.
Lo que rende iste tractos egoiste periculose pro le alteres es le facto que illos pote prender le controlo sur le vitas del gente, e causar profunde traumas e problemas de interaction social. Per exemplo on pote imaginar un persona que in loco de coler e amar su consorte o filios, fini per usar los come fonte de attention o admiration personal; o un persona que in loco de crescer per criticas constructive, attacca e repulsa tote los qui vole adjutar, dicente que son illos ad esser in error.
DUNQUE PER QUAL FACTORES ES LE NARCISSISMO CAUSATE?
Studios scientific sur le ADN del gemines ostende un forte componente genetic, etsi le recercatores ancora non sape qual genes son implicate, sed il es secur que le ambiente de vita importa e influentia le character e le conducta de un individuo. Parentes qui pone lor puere sur un pedestallo resulta cultivar le narcissismo grandiose, e parentes frigide e dominante resulta contrubuer al narcissismo vulnerabile.
Le personalitates narcissiste pare alsi plus presente in le culturas qui ben valuta e promove le individualismo e le autopromotion; in le Statos Unite de America, exempli gratia, le tractos associate con le narcissismo son in crescentia desde le annos 1970, quando le focalisation del annos 60 sur le vita communal e collective transiva verso le movimento de autoestima, usque arrivar al materialismo contemporanee. Plus recentemente, le retes social han multiplicate le possibilitates de autopromotion e protagonismo, e ben que il es importante notar que ad hodie il non existe ancora provas evidente que le retes social provoca narcissismo, il es totevia certe que iste medios dona al narcissistas un platteforma pro procurar se attentiones e status social.
POTE LE NARCISSISTAS MELIORAR SE IN LE ASPECTOS NEGATIVE DE LOR PERSONA?
Secundo mi puncto de vista, qualcunque cosa qui poterea promover un autoreflection honeste sur le comportamento verso se ipse e le alteres, come establir un percurso de psychotherapia o provar practicar compassion pro le alteres, pote juvar a cultivar le lateres melior del character. Le difficultate demora in le obstaculos que le narcissistas incontra in un labor de automelioration qui sia continuative; pro un narcissista, le autoreflection es dur, si provene de un angulo non laudative…
• ΘMNЄ • 